Dinthar barakhaihtu Kulikawn

MBOCWWB 8th Inter Village Football Tournament 2026-ah Kulikawnin Dinthar hnehin semifinal an inpet kai a, an veng chanchina hun duhawm bik a ni pha ngei ang. May 5, Thawhlehni tlai inkhelah hian hun pangngaiah 1-1 in an inhnehtawk a, penalty shootout-ah Kulikawn 4-3 in an vannei ta zawk.

RG Stadium-a inkhelah Kulikawnin inkhel bul an ṭan ṭha a, ball pet thiam an ṭangkaipui. Minute 13-naah Lalduhawma'n freekick aṭangin mawi zetin a pet lut a, Kulikawnin chak turin beiseina nung an neih phah.

Dinthar lamin team ṭha zawk an ni tih hriain na takin nawr mah se an vanneih ṭum a ni lo a, an goal khung pawmsak an ni lo. Minute 64-naah tawnhriat nei ṭha Lalzemawia'n a tauh lut a, offside vangin pawm a ni lo. Assistant referee-in offside a phar chhan hi Samuel Laltlanthanga vangah a ngaih theih a, inhnialna awm thei tak a ni.

Inkhel thununtu Dintharin siphurh an sut ta tho a, minute 69-naah corner kick hmang ṭangkaiin Nicholas Vanlalhmangaiha'n a tauh lut a, a pettu Lawmawma'n a pet ṭha hle.

Dinthar an tho chhuak mai turah ngaih theih mah se Kulikawn an ṭang tluan a, minute 90 chhungin goal dang a luh belh lo. Extra time minute 30 khelh a ni a, Kulikawn an ṭang tluan. Penalty shootout hmangin chak zawk zawn a ni a, Kulikawn keeper Sangzela'n Dinthar tana Jeremy pet a dang a, Zemawia'n a pet over bawk. Kulikawnin an beisei ngam loh semifinal an thleng.