Aizawl FC-in IFL an khel zel dawn

Indian Football League-ah Thawhlehni zan khan Aizawl FC leh Gokulam Kerala te 2-2 in an inhnehtawk a, Mizo club-in an elpui Kerala club laka point khat an hmuh avangin IFL aṭangin an relegate dawn lo.

Deccan Arena, Hyderabad-a inkhelah Mizo club an che ṭha zawk a, Khawbel tlangval Zomuansanga goal hnih khungin ṭum hnih hma hruai mah se Mirjalol Kasimov leh Gursimrat Singh te hmangin Gokulam-in an sut ve ve.

Zomuana hian minute 10-na lekah dinglam aṭanga ball lalutin box chhung aṭangin kawh zetina pet lut. Minute sarih hnuah Kasimov-a'n freekick aṭangin mawi zetin siphurh a sut.

Mizo club tan Vincent Lalduhawma'n penalty a hlawh chhuak a, Zomuana'n minute 32-naah hmahruai nawnna goal a khung. Aizawl FC-in first half an ṭang tluan thei lo a, box chhunga ball awm an 'clear' lawk theih loh avangin Gursimrat Singh-a'n Gokulam tan siphurh a sut.

Second half-ah chak tumin team pahnih an innawr chhunzawm a, goal erawh hmuh tur a awm tawh lo. Mizo club-in match 11 aṭangin point 13 an hmu a, table hnuai bera awm Gokulam Kerala-in point kua chauh an hmuh avangin Kerala club hian an umpha thei tawh lo. Coach R. Lalruatfela hote IFL khel zel turin an him.

Gokulam Kerala erawh tla thei dinhmunah an ding a, IFL khel zel turin match tawp berah Namdhari an hneh ngei a ṭul ang. Aizawl FC-in match tawp berah Real Kashmir an hmachhawn dawn a, Kashmir club pawh hi an relegate thei tawh lo.