Athletic Bilbao coach thar tur Terzic

Kum 2024-a Borussia Dortmund a chhuahsan hnua club nei loa awm reng, German coach Edin Terzic chuan season tharah chuan club a nei leh tawh dawn a, Spanish club Athletic Bilbao coach a ni dawn.

Kum 43 mi coach hian Bilbao coach zah kai tak Ernesto Valverde a thlak dawn a, Barcelona boss hlui Valverde hian Bilbao hi kum li zet a kaihhruai leh tawh hnuah, March thla khan season tawpa a chhuahsan tur thu hi a puang a ni.

Bournemouth coach chhuak tur Andoni Iraola chu Bilbao-ah hian kir tur anga sawi thawm a awm hman a, mahse, player a nih laia Bilbao tana khel ṭhin player aiah Terzic zawkin Spanish club hi a zawm ta.

Terzic hian 2020-21 leh 2022-24 inkarah khan Dortmund hi a lo enkawl ve ve tawh a, kum 2021-ah DFB-Pokal champion nihpuiin, kum 2023-ah Bundesliga match tawp bera an chak zawh loh avangin nomawi a chawipui lo a, kum 2024 Champions League final hruai thleng mah se, Real Madrid an ngam lo bawk.

Real laka an tlawm hnu hian Terzic hian Dortmund chhuahsan a dil a, club nen inhriatthiam tawnnain an inṭhen. Club dang enkawl loa a awm vang vang hnuah a lo kir dawn a, Chelsea nen pawh sawizawm ni hman mah se, Bilbao a pan dawn ta - kum hnih atan contract a ziak ang.

Terzic hian Slaven Bilic-a hnuaiah assistant coach hna a lo thawk tawh ṭhin bawk a, Turkish club Besiktas leh Premier League club West Ham-ah te Croatian coach thachhang dawltu hi a ni ṭhin.