Arsenal-in Kiwior an hralh

Portuguese champion Porto chuan Arsenal aṭanga loan-a an hawh mek, defender Jakub Kiwior chu a ngheta an lakluh thu an puang a, Poland international hian kum 2030 thleng Porto tana khel tur hian contract a ziak.

Kiwior-a'n Porto a zawm khan, season tawpah euro maktaduai 17-a zawm theihna dan a ziak tel a, a khelh ṭhat dan a zira €5mtd pek belh tura tih a ni bawk. A tawpah chuan Kiwior-a'n Porto lung a dum a, a nghetin an la lut ta a ni.

Kum 26 mi Kiwior hi Belgian club Anderlecht aṭanga inzir chhuak niin, Slovak club Zeleziarne Podbrezova leh MSK Zilina tana a khelh hnuah Italian club Spezia tan a khel a, January 2023 khan Arsenal a zawm.

Gunners tan match 68 a khel hman a, goal thum khungin, assist vawi nga a nei tel. Porto a pan hnuah Portuguese club tan match 38 khelin, top flight league nomawi a chawipui a, centre back-ah a hun tam zawk chu khelin, left back-ah chhawr a ni ṭhin bawk.