East Bengal lakah Mumbai an tlawm

Thawhlehni zan Indian Super League inkhelah Mumbai City an tlawm a, an mikhual East Bengal chu 2-1 in an hneh lo - Mumbai hi table-ah panganaah an tla thla nghal a, East Bengal erawhin table chung ber an luah ta vung thung!

Mumbai hian minute riatna lekah Brandon Fernandes hmangin goal hmahruai an khung a, mahni mualah hnehna an chang ngei dawn niin an inngai hman. Mahse, Kolkata club-in Youssef Ezzejjari (penalty) hmanga si phurh an sut hnuin, Nandhakumar Sekar chuan chakna goal a khung a, 2-1 a hnehna hlado chhamin East Bengal an haw.

Mualneitu team tan captain Lallianzuala Chhangte vanneih zan a ni lo a, Lunglei forward hian goal khung theihna hun vawi tam nei mah se, uiawm takin a hlah leh ṭhin - East Bengal keeper Prabhsukhan Singh Gill-a'n a dansakte chu uiawm a tling.

Mumbai-in an chance neih an chhawr loh chu an vanduai phah tiin a sawi theih a, LZa goal khung chu offside vangin pawm a ni lo bawk - mualneitu team tan Lianzuala bakah fullback Hmingthanmawia Ralte (Valpuia) leh Zothanpuia ten inkhel bul an ṭan a, an team erawh an chakpui zo lo.

Odisha laka East Bengal tana a match hmasa ber a khelh hnuah Jerry Mawihmingthanga'n Kolkata club tan inkhel bul a ṭan a, Edmund Lalrindika pawhin bul a ṭan - Lalchungnunga chu bench aṭanga luhtir a ni bawk.

East Bengal-in match 10 khel tawhin, league match thum khelh tur la awmah point 21 an nei a, ISL-ah hma an hruai mek - an hnuai chiaha awm Jamshedpur nen an point hmuh zat inang mah se, Men of Steel hian match khatin an khel tam zawk.

Pathumna Mohun Bagan-in point khat chiahin East Bengal an phak lo a, mahse, match khatin an khel tlem thung - team pahnih an la intawng dawn a, team pahnih an chak chhoh zel chuan inkhel boruak a 'hot' khawp ang.

Hetihlai hian Mumbai tan erawh champion beisei loh a finthlak tawh zawkin a lang - match li ngawt a zawnin an chak zo ta lo a, champion tur chuan thilmak a thlen tel ve a ngai tawh dawn a ni.