Thunder-in Lakers hneh nghal

NBA Conference semifinals-ah nimin zing khan Oklahoma City Thunder leh Los Angeles Lakers te an inhmachhawn a, 108-90 in Thunder-in hnehna an chang a, game 1 an la.

Paycom Center, Oklahoma-a inkhelah LeBron James hoin Lakers-in bul an ṭan chhe lo a, Thunder-in point an score ve hmain point sarih zet an score hman. Mahse OKC an insiamṭha har lo a, Shai Gilgeous-Alexander leh Chet Holmgren te inlarin 31-26 in first quarter-ah hma an hruai.

Second quarter-ah pawh Thunder an chungnung hret a, Holmgren-a kut a kal chhunzawm bakah defence lamah Alex Caruso nen an ṭangkai a, 61-53 in hma an hruai chhunzawm. Third quarter-ah pawh OKC an che ṭha zel a, Lakers erawhin hma an sawn thei lo a, 84-72 in an hnufual tawh.

Fourth quarter-ah Lakers basket a tang rei a, OKC erawh point score lamah harsatna an tawk ve lo a, point 19-in an inthlau hman hial. Lakers tan inlehthal turin thilmak a thlen a ngai tawh a, an khelh ṭhat tawk loh bakah hunin a daih tawh loh avangin, a tlawm zawkah an ṭang a, an result pawm thiam bak tih theih an nei lo.

Thunder tan Holmgren-a'n point 24 neii a score hnem ber a, rebound vawi 12 lain double double a siam bawk. Holmgren hi MVP ni lai SGA leh Ajay Mitchell (18) ten an thlawp ṭhat bawk. OKC tan Kenrich Williams tih loh chuan point an score vek a, an chak theih nan an ṭangrual ṭha.

Lakers tan Lebron-a'n point 27 zet a nei a, mahse a teammate te puihna a dawng ṭha tawk lo a, a kum ngaihtuahin la 'fit' viau mah a ṭhianten an thlawp ṭhat loh avangin a team a chakpui zo bik lo. Hliam damkawr Austin Reaves-a'n beisei a pha lo a, an chak loh chhan pakhatah a ngaih theih.

Inhliam vanga an chân mek Luka Doncic a la inlan thei lo zel a, Slovenian point guard hi game 2-ah pawh a khelh a la rinawm loh. Lakers medical team te chuan Doncic hi May 9-a game 3 an khelh hunah emaw, May 11-a game 4 an khelh hunah a lo kir an beisei thu an sawi. Team pahnihte hi May 8, Zirtawpni zing dar 7-ah an inhmachhawn leh ang.

Inkhel dangah Detroit Pistons chuan 111-101 in Cleveland Cavaliers an hneh ve bawk a, Eastern Conference table-a pakhatna Pistons chak nan Cade Cunningham (23), Tobias Harris (20) leh Duncan Robinson (19) te an thawh hlawk hle. Cavaliers tan Donovan Mitchell (23), James Harden (22) leh Max Strus (19) te khel chhe lo mah se Cavaliers an chakpui zo lo.