Mendy a chawl rei dawn

Real Madrid defender Ferland Mendy hliam chu endik a nih hnuah zai a ngai dawn a, thla nga tal a chawlh a ngai dawn a, Mendy tan World Cup beiseina a bo nghal.

Pathianni zan khan Real leh Espanyol te an inhmachhawn a, minute 10-na lekah Mendy hian ball a umna lamah a mal leh a kawng inzawmna a tina a, lakchhuah nghal niin Fran Garcia-a'n a thlak.

Real a zawm hnuah Mendy hi hliam vangin a chawl ngun a, tun hnai season hnih chhungin vawi 20 chuang a inhliam tawhin, match 100 chuang zet hliam vangin a khel thei lo.. Tun season-ah pawh a inlan tam lo a, inelna hrang hrangah match kua chiah la khelin, minute 500 chiah a la inlan.

Kum 30 mi Mendy hian Los Blancos-ah 2028 thleng contract a nei a, hliam a ngah avangin a hma hun pawh a chiang lo. Tun hnaiah a ṭhat theih dan berin a khel leh dawn nin lang hman mah se, hliam vang bawkin a chawlh leh a ngai.

Los Blancos hian tun season-ah defender hliam an ngah tawh a, Mendy hma hian Dani Carvajal leh Eder Militao te chu hliam vangin an lo chawl tawh bawk. Real hian season tharah inṭhuahfai an tum niin thuthang a tam a, an zingah Mendy a tel dawn leh dawn loh a chiang lo.

Hetihlai hian Real keeper rinrawl, Thibaut Courtois leh forward Kylian Mbappe te chu May 10, Pathianni zana Barcelona nen El Clasico an khelh tur atan an lo kir theih a beiseiawm niin journalist rintlak, Fabrizio Romano-a'n a sawi.