Ka thutlukna siam fuh ber a ni - PSG Chairman

Champions League nomawi chawi châk Paris Saint-Germain-in season hmasa lawk khan an club chanchina a vawi khat nan UCL nomawi an chawi tawh a, treble champion an ni.

French club hi tun season-ah treble champion ni thei tawh lo mah se, Ligue 1 leh Champions League-a champion kawp thei dinhmunah an ding leh ta - Luis Enrique vang tih loh rual a ni lo.

Paris Saint-Germain chairman Nasser Al-Khelaifi pawh a hlim a, Spanish coach an la lut chu a thutlukna siam tawha a tihfuh ber a nih thu a sawi chhuak.

Nasser Al-Khelaifi chuan, "Luis Enrique hi kan thil neih ṭhat ber a ni a, thutlukna ka siam tawh zawng zawnga ka la siam fuh ber a ni. Kum 15 vel zet chu kan hnena a lo kal theih nan kan lo inbe tawh.

"Coach ṭha tak a ni a, khawvela coach ṭha ber a ni mai lo a, mimal tak pawhin mi ṭha tak a ni. Ni tin club inrelbawlna a kalpui dan te, player a enkawl dan, media a hmachhawn dan thleng hian a ṭha thlawt a ni," a ti a, a coach chu a chhuang hle.

PSG hotupa chuan sawi zawmin, "Kan club-in Enrique kan nei thei hi kan vannei a, he club thawnthu ngaihnawm tak ziaktu midang zawng kan nei pawh hi kan lawm a ni.

"Kan thisenah chak duhna a bet tlat a, chu chu zaninah kan lantir a nih hi. Kan player-te hi footballer an ni mai lo a, pasalṭha an ni e. Enrique hian PSG mai ni loin football a thlak danglam a, ka chhuang hle. Khawvela coach ṭha ber a ni e," a ti thlawt.