Mizoramin quarterfinal an lut

Swami Vivekananda U20 Men’s National Football Championship 2026-ah Mizoramin nimin zing khan Uttar Pradesh 6-1 in an sawp a, harsatna tawk loin quarterfinal an lut.

Narainpur, Chhattisgarh-a inkhelah Mizoram leh Uttar Pradesh te inkhel ṭantirh lamah an inhnehtawk hle. Mesak C. Lalrinngheta penalty hmangin Mizoramin hma an hruai a, first half-ah 1-0 chauh a ni.

Second half ṭantirhah Uttar Pradesh-in Shavez hmangin an sut a, 1-1 a ni hman. Mizoramin Vanlalramnghaka hmangin minute 50-naah hma hruai a, an hawi kir tawh lo. Coach H. Lalrindika hote tan Ramnghaka'n hattrick a siam bakah Lalhmangaihzuala leh C. Lalkhawngaiha ten goal khat ve ve an khung bawk.

Mizoram hian Uttar Pradesh an sawp hma hian Arunachal Pradesh (7-0) leh Madhya Pradesh (10-0) te an sawp a, group match-ah chak vekin quarterfinal an lut.

Mizoram manager F. Vanlaltleipuia chuan, "Player 18 kan hruai a, pakhat damdawi inah a awm a ngai a, pakhat hliam vangin kan chhawr thei lo a, bench-ah panga chauh a awm. Chutichung chuan kan nauten theihtawp an chhuah a, Pathian min hruaina a ropui takzet. Quarterfinal-ah pawh Mizoram tan theih tawp kan chhuah anga kan engkim kan hlan ang," tiin Vanglaini a hrilh.