NBA Playoff-ah Spurs an insiamṭha nghal

Game 1-ah uiawm takin chak lo mah se, San Antonio Spurs an insiamṭha leh nghal a, nimin zing khan 133-95 a Minnesota Timberwolves hnehin Conference semifinals game 2-ah hnehna an chang a, seven game series-ah 1-1 in an inhnehtawk ta chiah.

Frost Bank Center, San Antonio-ah inkhel ṭan aṭangin Spurs an phur nghal a, first quarter-ah 24-17 in hma an hruai a, an khel ṭha nghal hle. Second quarter-ah Spurs player te kut a kal ṭan a, 59-45 in an hmahruaina an belhchhah. Spurs player ten point score lamah harsatna an tawk lo a, Wolves erawhin second quarter an hmang ṭha tawk lo a, an basket a tan rei ṭhin avangin point 25 zetin an hnufual hman.

Third quarter-ah Wolves-in game a dang a, point 28 score-in hma an sawn hret. Mahse Spurs an inthlahdah bik lo a, inkhel an la thunun tho. Spurs hian point 35 score-in 98-73 in third quarter an khar. Fourth quarter-ah Wolves-in theihtawp chhuahin Spurs pawhthlak tum mah se, quarter danga an khelh chhiat an tuar a, a chungnung zawkah Spurs an ṭang tluan zak a, point 38-a inthlauin an 'blow out' chiang hle.

Spurs tan player pasarih laiin point 10 an score tling a, player 15 khel zingah Mason Plumlee tih loh chuan point an nei vek. Dan pangngaiin Victor Wembanyama a langsar leh a, Wemby hian point 19 neiin rebound vawi 15 zet a la a, Spurs chak nan a thawh hlawk takzet a, final luh an tum a nih chuan a khelh ṭhat zel a pawimawh dawn.

Hetihlai hian Wolves-in beisei an pha lo a, game hmasa nen khaikhinin team dang hlak an ni. An thiampuipa Anthony Edwards, Julius Randle, Jaden McDaniels leh Terrence Shannon Jr. ten point 12 ṭheuh an score a, an ṭhiante puihna an dawng ṭhat tawk lo.

Wolves-in chanchin duhawm lo dang an nei a, an shooting guard Ayo Dosunmu chu a ke artui a tihnat avangin a chhuah a ngai a, minute 10 chauh court chhungah hun a hmang hman a, a lo kir hun tur sawi theih a la ni lo.

Donsunmu bakah hian Donte DiVincenzo chu inhliam a neih sa a ni a, DiVincenzo hi tun season-ah a hmel kan hmuh a rinawm tawh loh a, Wolves tan shooting guard pahnih awm lo hi channa nasa tak a tling. Team pahnihte hi May 9, Inrinni zing dar 7:00-ah an inhmachhawn leh dawn a, Wolves tan thi leh thau pawlha khelh a ngai tawh ang.

Inkhel dangah New York Knicks chuan 108-102 in Philadelphia 76ers an hneh a, series-ah 2-0 in an hmahruaina an belhchhah. Knicks tan Jalen Brunson (26), Karl-Anthony Towns (20) leh OG Anunoby (24) te chu an chakna hnar a ni. 76ers erawh an la insiamrem thei lo a, Inrinni zing dar 4:30-a an inkhelh leh hunah an chak lo leh a nih chuan, inlehthal a harsa tawh ang.