Benfica-in Mourinho cham turin an duh

Spanish club lian Real Madrid hellai, Jose Mourinho chu a awm mekna Benfica chuan season khat dang cham turin an duh a, season tharah Real-in an pu hlui hi lakluh duh mah se thil awlsam a ni dawn lo.

Álvaro Arbeloa-a'n Real a enkawl chhunzawm dawn lo tih a chian hnuah Mourinho hming a ri nghal a, club hruaituten Portuguese coach hi Santiago Bernabeu tlu chhe mek tung ding leh turin an duh. Mourinho pawhin Real-a kir leh a hreh lo nia sawi a tam hle.

Benfica pawhin an coach chungchanga chanchin awm hi an hai lo a, hetiang boruak karah hian Mourinho hi season khat tal la awm se an ti hle. Benfica president Rui Costa leh a hote'n Mourinho contract pawhsei an tumna zawng zawng chu a hlawhtling rih thei rih lo.

Mourinho leh Benfica hian an inremnaah, pound maktaduai thum 'release clause' anga pe thei an awm chuan Mourinho a chhuak thei dawn. Hei hi nikum lama Xabi Alonso leh Bayer Leverkusen inkar thil thleng, euro maktaduai riat an chawi ang kha a ni deuh ber.

Tun thleng dinhmunah chuan Los Blancos hruaituten, inbiakna an kalpui thu hriat tur a la awm lo a. Hetihlai hian training naah buaina a awm a, Aurelien Tchouameni leh Federico Valverde te an intibuai a, tharum thawhna erawh a thleng lo thung niin journalist Fabrizio Romano-a'n a sawi.

Tun season-ah Real dressing room-ah, Alex Carreras leh Antonio Rudiger te inkarah buaina a lo awm tawh bawk. Dressing room boruak leh result tih ṭhat nan coach tawnhriat ngah hi Real-in an mamawh a, thu chiang engmah la awm lo mah se, Mourinho hian Real a zawm lo ang tih a sawi theih loh.