Barca-in Bastoni leh Fofana an duh

La Liga hmahruaitu Barcelona chuan season tharah an tlarhnung thuam chak nan, Inter Milan defender Alessandro Bastoni leh Chelsea defender Wesley Fofana an duh a, nipui transfer-ah defender pahnih zinga pakhat zawk hi lakluh an tum dawn.

Tun season-ah Barca an che chhe hran lo a, La Liga champion mai thei dinhmunah an ding tawh. Mahse club hruaitute chuan season thar an thlir lawk der tawh a, Bastoni an hmu tai hle.

Kum 27 mi Bastoni hi a man a tlawm dawn lo a, Inter hian pound maktaduai 60 aia tlem an pawm dawn lo a, sum lama harsatna tawk Barca tan Bastoni lak a awlsam dawn lo. Club hruaituten Bastoni hi duh mah se, an manager Hansi Flick berin thuchhuah a la nei lo a, thutlukna a siam veleh dilna an thehlut dawn.

Bastoni bakah Barca hian Fofana nen sawi zawm an ni a, French defender hi a agent-ten Barcelona hnenah an lo hmelhriat tir tawh a, Barca hruaitute pawhin hmaichhana an inbiak hnu hian an player duh thlan zingah pawh an telh tawh.

Barca duh ber chu ke ding lam hmang, tlarhnung laia khel thei a ni a, Bastoni hi ke vei lam hmang a nih avangin Fofana hming a ri ring zual. Chelsea pawhin Fofana chelh reng an tum bik lo a, French defender manah hian a tlem berah euro maktaduai 30 tal hmuh an beisei.

Catalan club hruaitute erawh chuan kawng dang Fofana hi loan-a lak phawt a, a hnua lak ngheh an duh zawk thung. Hei hian an sum hman tur a tiziawm zawk dawn a, mahse Blues erawh chuan a pangngaia hralh an duh thung.

Spanish club lian hi tun season-ah treble champion thei dinhmunah ding hman mah se, Champions League leh Copa del Rey-ah Madrid club pakhat zawk Atletico Madrid-in an pet chhuak ve ve a, Atletico an hmachhawn ṭum hian goal an chhuah hnem hle. Hetiang a nih avang hian tlarhnung thuam chak an ngai pawimawh thar.

Hetihlai hian Barca hian Manchester United aṭanga an hawh, Marcus Rashford chu a ngheta lak tumna an nei lo a, English forward hian Barca a chhuahsan a rinawm. Mahse Rashford hian Old Trafford-a kir a duh tawh lo nia sawi a awm a, Rashford dinhmun a chiang lo.

Man United coach Michael Carrick chuan, "Rashford chungchangah thutlukna engmah siam a ala awm lo a, tunah chuang engmah thuchiang a awm lo," a ti. Barca-in June 15 thleng Rashford lei ngheh theihna hun an nei a, tunah lakluh duh lo mah se thil tam tak a la inthlak thei a, nipui transfer a ngaihnawm chho dawn.