Mercedes-ah Russell-a dinhmun a nghing em?

Mercedes driver George Russell chu tun hnai inelnaa a chet ṭhat tawk loh avangin, team-ah a dinhmun nghing niin khawthlang chanchinbu ten an tarlang a, Mercedes-ah contract thar a ziah dawn leh dawn loh a chiang lo.

Inelna hnuhnung pahnihah aṭang khan, sprint point-te hi chhiar tel lohin Russell hian point 24 chauh a hlawhchhuak a, hei hi a teammate Kimi Antonelli-a'n a zawna vawi thum hnehna a chan nena khaikhin chuan tam lo tak a ni. Russell tan Antonelli hi la umphak theih ni tho mah se, Mercedes driver pahnihte inkar point 20-a inthlauhna hian Russell tan hian nipui chawlh hman a ti phurawm dawn loh.

Tunah chuan an pahnih inkar contract dinhmun hi, thla tlemte liam ta nena khaikhin chuan a let thawk a ni tawh a. Hun rei vak loah khan Antonelli hian result ṭha a nei thei lo a, Mercedes team principal Toto Wolff-a'n driver naupang tak, team lian taka a dah nghal mai kha an sawisel nasa hman hle. Khatih lai khan Russell erawh chuan podium-ah hmun a chan deuh reng bakah, chet sual nei miah loin a che ṭha thung.

Mahse tun hnaiah Antonelli a che ṭha takzet a, a tan contract thar ziah chu thil chiang saah a ngaih theih tawh. Hetihlai hian Russell-a dinhmun erawh hlauhthawnna tur la awm lo mah se, a awlsam dawn lo thung. Kum 28 mi Russell hian season riat zet inelna sang hi a lo hmachhawn tawh a, a vanglai hun hmang mek mah se a result a ṭhat tawk loh chuan Mercedes a chhuahsan mai a rinawm.

Hetihlai hian Max Verstappen hming a ri ve reng a, nikum nipui chawlh lai khan world champion vawi li lo ni tawh hi Mercedes nena sawi zawm a lo ni tawh. Toto Wolff pawhin Verstappen hi lak theihna dawn chuan, engpawh tih huam thu a lo sawi tawh.

Dutch driver hian kum 2026-ah Red Bull-ah a la awm dawn tih sawi chiangin, amah ngeiin thuthang chu a titawp thung. Verstappen hi a che ṭha chhunzawm a McLaren driver pahnihte lakah 'comeback' ropui lantirin, a zawnin vawi nga nan a champion teuh hle.

Nikum kha chuan Russell a chet ṭhat avangin Wolff-a tan thutlukna siam a harsa a, a chet ṭhat vanglaia chhuahtir kha thil dik lo leh inzah lohna ang hiala ngaih theih a ni. Mahse tunah chuan thil a danhlam hret a, Wolff-a hian Verstappen-a hi lak leh a tum a nih chuan, driver pahnihte zingah a chhuak tur zawk a chiang tawh ang.