Napoli-in Hojlund lak ngheh an duh

Italian club Napoli chuan Manchester United aṭanga an hawh mek, Rasmus Hojlund chu a ngheta la turin rilru an siam fel a, nipui laiin Danish forward hi la turin thutlukna an siam.

Tun season ṭan dawn khan Napoli hian Hojlund hi an hawh a, inelna hrang hrangah match 41 khelin goal 14 a khung. Hojlund a chet ṭhat avangin Napoli hian United nen an inremnaa, pound maktaduai 38-a lak ngheh theihna chu an hmang ṭangkai dawn.

Kum 23 mi Hojlund hian 2023 khan pound maktaduai 76-in Man United a pan a, season hnih a cham chhungin match 95-ah goal 26 a khung hman. Old Trafford-ah beisei a phak loh avangin loan-in Napoli a pan a, Italy-ah a nghetin a lut tawh dawn.

Hojlund hi Antonio Conte hnuaiah a tla tlum nghal a, Romelu Lukaku a inhliam bawk avangin tun season-a Napoli striker rinrawl a ni. Denmark-in World Cup an khelh dawn loh avangin Hojlund tan, season thara Napoli Champions League khelhpui tumin a insawrbing thei ang.