Zaninah Chanmari Vs Dempo SC

Indian Football League-ah Chanmari FC-in zanin dar 6:30 hian RG Stadium, Mualpuiah Dempo SC an mikhual dawn. MPL champion lai Chanmari hian hnehna an chang thei a nih chuan championship stage bikah table mawngphah an chhuahsan thei ang.

Chanmari hian March 12, 2026 khan Dempo hi an mikhual tawh a, Suangaihmuana leh KC Malsawmsanga te hmangin ṭum hnih hma hruai mah se Goan club hian Sebastian Gutierrez leh Marcus Joseph te hmangin an sut ve ve. Mizo club hian chak theihna hun ṭha an bawhpelh a, minute 72-naa Malsawmsanga Renthlei hnawhchhuah a nih avangin a tawpah phei chuan chak lo thei dinhmunah an ding hial.

Goan club hian an mualah Aizawl FC 3-0 in an hneh tawh bawk a, hei vang hian Dipankur Sharma enkawl Chanmari tan Dempo SC lakah fimkhur a ṭul dawn. Championship stage chinah Chanmari hi an che ṭha lo a, Diamond Harbour laka 2-0 a an tlawm hnuah Shillong Lajong lakah 4-0 in an chak lo.

IFL-ah champion tur a la chiang lo a, nizan khan hmahruaitu Diamond Harbour leh Rajasthan United an inkhel a, result kan hre hman lo. Kolkata club elpui pahnih Sreenidi Deccan leh Shillong Lajong te May 10, Pathianni zan dar 6:30 hian an inkhel dawn. Deccan Arena-a hnehna chang zawkin champion beiseina an nei chhunzawm ang.