Chelsea tan beiseina thar a awm?

Tun season-a team talbuai tak Chelsea chuan vawiin tlai dar 5:00 hian Anfield-ah Liverpool an lenchilh dawn a, club pahnihin beisei tur an la neih ve ve avangin inkhel hmuhnawm a beisei ngam ang.

Blues hian tun season-ah coach pathum tehmeuh an nei tawh - Enzo Maresca an ban hnuah kum ruk chuang atana contract an ziahpui, Liam Rosenior chu thla thum vel awrh an kawl hman tihin an ban leh a, coach lailawk Calum McFarlane hnuaiah an khel mek.

London club hi Premier League table-ah pakuana an ni mek a, league match ruk zet chu a zawnin an tlawm tawh bawk! Mahse, mak tak maiin Blues hian Champions League khelh beiseina thar an nei tlat!

Hetihlai hian an lenchilh tur Liverpool hi an ropui vanglai a ni bik lo a, season hmasa lawka champion team hi tunah chuan EPL club vantlang ang mai an ni - season thara Champions League khel turin an dinhmun a la chiang bik lo?

Engtin maw?

Blues hi Premier League table-ah pakuana an ni mek a, season thara UCL khel tur chu pangana chin a ni. Tun dinhmuna pangana an phak lohna hi point 10 a ni a, an hmabak match thumah Blues hi chak vek pawh ni se, point khatin pangana Aston Villa an phak thei tawh chuang lo.

Hemi thlir chuan Chelsea tan UCL khelh beiseina a awm tawh lo. Mahse, ni e, mahse tih a ngai - Aston Villa-in Ningani zan khan Europa League semifinal-ah Nottingham Forest an pet chhuak a, hei hian Blues tan kawng a hawng ta.

Villa hi Europa League-ah champion se, EPL-ah pangana ni bawk se, EPL-a paruknain UCL an khel dawn. Thil danglam ve tak erawh, Villa hi palina ni ta se, Europa champion tho se, EPL-a parukna hian UCL an khel thei dawn lo.

Hei hi a chhan ber chu, UEFA hnuaia European Performance Spots (EPS) an tih kaltlanga English club-ten UCL-a hmun an neih belh hi pangana pual a nih vang a ni. A tawi zawnga sawi chuan, EPL-a paruknain UCL an khelh dawn chuan Villa hi pangana an nih a, Europa League an champion a ngai bawk.

Chelsea beiseina chu

Blues hian Rosenior an ban hnuah match hnih an khel tawh. FA Cup semifinal-ah 1-0 a Leeds United hnehin final an lut a, EPL-ah erawh Europa League semifinal khelh dan vanga indah ṭha, Nottingham Forest B team chu 3-1 in an ngam lo.

Forest B team laka goal thum chhuahtu Chelsea hi Anfield-a Liverpool hneh tura beisei an harsa a, hetihrual hian Reds hian season an hman ṭhat bik loh avangin London club tan beiseina a neih ngam.

Chelsea hian league-ah Liverpool, Tottenham Hotspur leh Sunderland an la tum dawn a, Spurs chiah hi mahni home-a an tum tur a ni. Blues hian parukna Bournemouth hi point rukin an phak lo mek bawk a, paruknain UCL khel dawn pawh ni se, thil mak an beisei tel chu a ngai ve hrim hrim!

Blues hian goalkeeper Robert Sanchez chu hliam vangin an chhawr thei dawn lo a, chuti a nih chuan Filip Jorgensen a inlan a ṭul dawn tihna a ni. Hetihlai hian captain Reece James leh Levi Colwill ten club training an zawm leh tawh a, Blues tan chanchin lawmawm lam a ni.

Hello Liverpool

Liverpool-in an league match hnuhnung berah Manchester United an ngam lo a, tun season inelna hrang hrangah match 18 an tlawm tawh - an 'puja' fuh lai chu a ni bik lo tih a chiang.

Reds hi table-ah palina ni mek mah se, parukna Bournemouth aia an sanna hi point ruk chauh a ni a, an hmabak fixture enin an la him bik lo. Chelsea zawhah hian Aston Villa leh Brentford an la hmachhawn dawn!

Arne Slot-a team hian UCL khel chiang turin match thum aṭangin point li an la mamawh a, Anfield-a Chelsea an ngam lo a nih chuan hmabak match hnihah tlawm a thiang tawh dawn lo tihna a ni.

Reds hian third choice keeper Freddie Woodman an rin chhunzawm a la ngaih hmel a, he thu buatsaih a nih lai hian Mohamed Salah, Alexander Isak, Florian Wirtz leh Ibrahima Konate dinhmun a chiang lo bawk - Blues tan Liverpool tum hun lai tak a ni e!