Republic Veng chakna 'keeper tihsual' leh penalty

MBOCWWB 8th Inter Village/Local Council Football Tournament semifinal first leg-ah rinlawk ang ngeiin Republic Vengin Kulikawn2-0 in an hneh a, an chak dan erawh a awlsam lo thung. Kulikawnin goal venhim hna an thawk a, goalkeeper chetsual vangin minute 62-naah Vanlalkrosschhuangzela Ralte-in a khung bakah captain Lalnunzira'n minute 90-naah penalty aṭangin a khung.

Semifinal second leg hi May 12, Thawhlehni hian RG Stadium-ah khelh a ni dawn. Tlai dar 4:00-ah Republic Veng leh Kulikawn an inkhel ang a, zan dar 7:30-ah Ramhlun South leh Sihphir Venghlun te an inkhel ang. Sihphir Venghlun hian first leg-ah 4-1 in hnehna an chang tawh a, Republic Veng nen final lut turin an dinhmun a ṭha hle.

Plan nei Kulikawn

Kulikawnin an khingpui an hrechiang a, CYMA Football champion lai Republic Veng an hmachhawn bakah second leg khelh tur a la awm avangin fimkhur takin bul an ṭan. Aizawl District huam chhung inelnaah semifinal hial an thlen avangin Kulikawn mipui an phur a, ṭantu pawh an nei ṭha - bus pahnih leh pick up pathumin RG Stadium an pan.

Mizoram tan pawha captain hna chelh tawh BJ Lalbiakhlua'n Kulikawn a enkawl a, semifinal thleng turin an vannei ringawt lo tih an pholang. Kulikawnin tlarhnung an ti phui ṭha a, Republic Vengin goal khung an harsat hle. First half-ah goal a lut lo a, chak tura rinkai Republic Veng pawh an buai hman hle.

Goal hnih a tawk

Republic Vengin an player pathum lak zinga mi Vanlalthanga bul an rawn ṭantir a, Thanga hian tlarhnung aṭangin tlarhma a rawn pui nasa. Mahse, match fitness a nei lo tih a hriat a, goal hmaah a vannei tlat lo.

Thanga hian goal khung theihna tur chance ṭha a nei a, goalkeeper chauh a hmachhawn hnuah a kung lo. Republic Veng tlangval Kross-a pawhin keeper a bum vek hnuah a khung lo bawk.

Counter attack hmangin Kulikawnin nawr tum ve bawk mah se Laltluangliana an paltlang thei lo a, goalkeeper RS Lallawmzuala pawhin tlarhnung aṭangin attack a pui ṭha hle.

Second half-ah Republic Vengin an nawr chhunzawm a, goal hmaah an vannei ta. Minute 62-naah wing back thawkrim Hmangaiha cross chu Kross-a'n a tauh a, Kulikawn keeper Sangzela'n man sualin goal-ah a lut.

Bench aṭanga F. Lalrinpuia (Valpuia) luh hnuah Republic Veng khel a nghet ṭha lehzual a, goal mamawh Kulikawnin goal venhim hna tho an thawk. Keeper Sangzela'n save pui bik a rawn nei a, man of the match-a thlan Zirtea pet a dan hnuah Thanga pet a dang leh hman!

Hun tawp dawn hnaiah tawnhriat nei ṭha danglamna a rawn lang a, Valpuia'n Kulikawn innghahna Hmingtea hmachhawnin penalty a hlawh chhuak. Zirtea rawn pen chhuakin minute 90-naah goal hnihna a rawn khung a, inkhel an thunun bawk avangin nuam sa takin second leg an khel thei tawh ang.