Bagan tan a chung bera awmna hun

Indian Super League-ah champion tur a la chiang lo hle - hmahruaitu East Bengal aṭanga parukna Punjab FC thlengin champion beiseina an la nei vek!

East Bengal hian match 10-ah point 21 hmuin, hma an hruai mek a, parukna Punjab FC hian khelh zat inangah point thum chauhin East Bengal an phak lo.

Hetiang boruak karah hian Mohun Bagan chu vawiin tlai dar 5:00-ah an inlan dawn a, FC Goa khelmualah an leng dawn - Bagan hian point khat chauhin East Bengal hi an phak lo a, match khatin an khel tlem thung.

Lalengmawia Ralte (Apuia) khelhna Bagan hian hnehna an chang a nih chuan ISL table chung ber an luah zui dawn tihna a ni. ISL-ah match 13 chauh khelh a nih dawn avangin vawi khat chetsual hi a pawi thui viau tawh ang.

Goa hian match 11-ah point 19 neiin, champion beiseina a la bo bik lo a, he club-ah hian Ayush Chhetri chu player pawimawh niin, Daniel Lalhlimpuia, Jerry Lalrinzuala leh Malsawmtluanga te an awm bawk.