Palace-in Conference League final lut

Ningani zan Conference League semifinal khelhah Crystal Palace chuan 2-1 in Shakhtar Donetsk an hneh a, aggregate-ah 5-2 a chakin final an lut.

Selhurst Park-a inkhelah mualneitu Palace-in ball an chang tlem zawk a, mikhual team Shakhtar-in inkhel an thunun zawk. Mahse minute 25-naah Eagles full back Daniel Muñoz-a cross chu Shakhtar defender Pedrinho-a'n an lamah a dang pial lut a, Palace-in hma an hruai.

Minute 34-naah Ukrainian club tan Eguinaldo-a'n an siphurh a sut a, Shakhtar an phur hle. Mahse Eagles tan Ismaila Sarr-a'n minute 52-naah pet goal lehin, a team hma a hruai nawnpui a, goal dang a luh tawh loh avangin 2-1 in Crystal Palace an chak.

Semifinal pakhat zawkah Rayo Vallecano chuan, Alemao-a goal hmangin 1-0 in French club Strasbourg an hneh a, aggregate-ah 2-0 a chakin final an lut ve bawk. May 27 zanah Spanish club hi Crystal Palace nen final-ah an inhmachhawn dawn.