Club World Cup final khel tur Liverpool
European champion Liverpool chuan zanin dar 11:00 hian Club World Cup final an khel dawn a, South American champion Flamengo nen an inkhel ang. Liverpool hian semifinal-ah CONCACAF Champions League nomawi chawitu Monterrey chu 2-1 in an hneh hram a, Brazilian club Flamengo hian Asian champion Al Hilal chu 3-1 in an hneh ve bawk.
Brazilian Serie A champion ni bawk Flamengo hi attacking football hmuhnawm tak pho chhuak ṭhin an ni a, 4-1-3-2 formation chu coach Jorge Jesus-a'n a hman ber a ni. Tlarhmaah hian goal a khung theih em avanga'Gabigol' tia hriat hlawh Gabriel Barbosa an nei a, a kawppui Bruno Henrique nen hian goal khung lamah an inthlahrung lo hle.
Gabigol hian tun season-a match 58-a khelhah goal 43 a khung a, Bruno hian match 61-ah goal 35 a khung thei thung - an nep lo. Tlarhnungah Atletico Madrid defender hlui Filipe Luis leh Bayern Munich legend Rafinha an nei a, si ban nghaktu Diego Alves hi Valencia keeper hlui a ni.
Reds tan dam lohna avanga semifinal khel thei lo defender Virgil van Dijk-a la dam chiang lo a, Dutch defender a inlan theih loh chuan Joel Matip leh Dejan Lovren an inhliam bawk si avangin Jordan Henderson leh Joe Gomez inkawp leh a rinawm - Flamengo tan chanchin lawmawm a ni.
Zanin Inkhel Tur
Third Place
Monterrey 08:00 PM Al-Hilal
Final
Liverpool 11:00 PM Flamengo