Tukin zing dar 7:30-ah Mizoram vs Manipur

Swami Vivekananda U20 Men’s National Football Championship 2026-ah Mizoramin quarterfinal-ah SAI 6-2 a sawpin quarterfinal an lut a, tukin zing dar 7:30 hian Manipur nen RK Ashram Ground, Chhattishgarh-ah semifinal an khel ang.

Coach Lalrindika Hmar kaihhruai Mizoram team hian group stage-ah an khingpui an sawp vek a, quarterfinal-ah pawh goal khung turin harsatna an tawk lo. SAI lakah NorthEast United reserve-a awm mek Lalrinfela leh SYS Academy-a awm Vanlalramnghaka ten hattrick an siam a, tun inelnaah Mizoramin match tinah goal ruk an la khung tling vek.

Mizoram khingpui tur Manipur hian semifinal lut turin West Bangal 2-1 in an hneh hram. Team ṭha pahnih inkhelah West Bengal-in Tanbir Dey hmangin minute 57-naah an khung a, Manipur tan Chandam Akash Meetei-a'n minute 79-naah siphurh a sut a, hun pangngaiah 1-1 a ni. Extra time-ah Chandam bawk a rawn inlar a, minute 109-naah Manipur chakna goal a khung.

Mizoram coach Rindika Hmar chuan, "Manipur hi team ṭha tak an ni a, kan inkhelh tawk viau ka ring. Keini lamah Freddy leh Aldrin-a te kan la chhawr theih a rinawm lo a, chutihrualin player inhliam hi chhuanlam atana hman kan tum lo. Mizoram tan theihtawp kan chhuah dawn a, Mizo mipuite ṭawngṭaipuina kan rawn ngen e," tiin Vanglaini a hrilh.

Mizoram manager F. Vanlaltleipuia chuan, "Quarterfinal-a hnehna kan chang thei hi lawmawm kan ti a, Pathian min hruaina leh awmpuina zar a ni tih kan hriatin lawmawm kan ti lehzual. Kan naute hian theihtawp an chhuah a, kan inkhelh leh tura pawh kan theihna zawng zawng kan hlan ang. MFA hruaituten min ngaihtuah em em a , ṭha taka kan khelh loh hlauin kan mamawh tin reng min pe a , kan thla a muangin an chungah kan lawm takzet zet a ni," tiin Vanglaini a hrilh ve bawk.