Chanmari FC-in Dempo SC an hneh

Indian Football League-ah Chanmari FC-in player 10-a khel chungin Dempo SC an hneh a, Championship round-ah panganaah an awm. Mizo club hian match hnih khelh tur an la nei a; May 17, Pathianni zan hian Deccan Arena-ah Sreenidi Deccan hmachhawn ang a, round tawp berah Rajasthan United an hmachhawn bawk ang.

RG Stadium-a inkhelah Chanmari FC tan Serchhip tlangval Lalruatsanga leh Brazilian forward Jota ten goal an khung a, Aron Vanlalrinchhana hnawhchhuah ni mah se player 10-a khel chungin Mizo club an chak tho.

Dipankur Sharma-a'n hliam vangin player thlan tur a ngah tawk lo a, defence laiah Zothanpuia (Thangpuia) dahin Marlon nen a inkawp tir a, thutlukna ṭha a ni. Midfielder pawimawh Christopher Kamei a khelh theih loh avangin Lalthangliana'n (AB-a) bul a ṭan ve bawk.

Inkhelh hmain Goan club hi panganaah an awm a, paruknaa awm Mizo club tan paruknaa awm theihna hun ṭha a ni. Mualneitu lamin inkhel bul an ṭan ṭha a, chance hlauhawm bik erawh an insiam thei lo.

First half injury time-ah Chanmariin corner kick an hmu a, Dempo lamin an clear thei lawk lo a, Serchhip tlangval Ruatsanga'n a back volley goal. Second half-ah pawh Mizo club bawk an che ṭha a, Dempo-in keeper T. Mawia tan hna an siam thei lo.

Cherhlun tlangval Aron-a'n ṭha tak a lakluh hnuah a pet over a, Chanmari midfielder hian hun tawp dawn hnaihah ṭul lo takin Dempo player a titlu a, yellow card vawi hnihna chawiin hnawhchhuah a ni.

Dempo-in an tamna hmang ṭangkaiin na takin an nawr a, goal an khung thei lo. Brazilian forward Jota erawh bench aṭanga rawn lutin ṭha takin injury time-ah a pet lut. Goal dang a luh belh lo a, Chanmari FC 2-0 in an chak.

Inkhel dangah Diamond Harbour-in Rajasthan United 5-2 in an sawp a, match 12 aṭanga point 28 hmuin champion turin an dinhmun a ṭha ta hle. Kolkata club hian Dempos SC leh Shillong Lajong te an la hmachhawn dawn a, point thum an hmu thei a nih chuan IFL-ah an champion ang a, season thara Indian Super League an khel bawk ang.