Chelsea draw-tu Liverpool fans lungawi lo

Anfield-ah Liverpool fan-ten an player leh coach te an duhkhawp lo tih lantirin, an au el a, team harsat lai pawha thlawp tlat ṭhintu an tih Liverpool fan-te meuh pawhin Arne Slot-a hnuaia an result an hne zo zai ta niin a lang!

Inrinni zan khan Liverpool chuan league match ruk zet a zawna tlawm tawh Chelsea chu Anfield-ah 1-1 in an inhnehtawkpui a, Reds tan Champions League khelh phak beiseiawm zel mah se, Liverpool fans an lawm lo a, an team an au el.

Merseyside club tan Ryan Gravenberch chuan minute rukna lekah goal hmahruai khung mah se, Liverpool an hmuhnawm loh chhunzawm a, Chelsea tan Enzo Fernandez chuan si phurh sutin, hun tawp thlengin goal dang a lut tawh lo.

Liverpool an chak zo lo a, an hneh zawh loh team hi tun hnaia result nei chhe tak Chelsea an ni a, fans an lawm tawh lo - season thara Arne Slot hmuh zel hi an châk tawh lo khawp ang!

Beiseina thamral

Liverpool-in bul an ṭan ṭha viau - rawlthar Rio Ngumoha-a'n inkhel bul ṭanin, Reds tana inkhelh tam a phu tih a pholang nghal a, minute rukna lekah Gravenberch-a goal hmahruai khung tur chu a siamsak.

Dutch midfielder-in ṭha zetin goal hmahruai a khung a, mahse, Reds ṭantuten hma an hruai zui dawn emaw an intih laiin an beisei sual chiang hle. Chelsea chu team hlauhawm zawk an nih chhunzawm ta daih.

Hliam vanga a chawlh hnua lo kir, Reds second choice keeper Giorgi Mamardashvili chuan Marc Cucurella khung tur nia lang chu ṭha takin a dansak a, minute 35-naa Enzo Fernandez-a freekick petah erawh a che hman lo.

Enzo hian Blues hmahruaina goal khung theihna remchang a nei zui a, mahse, a vannei zui lo. Chawlhlawk hman zawhah Cole Palmer chuan London club tan hmahruaina goal a khung emaw a inti a, mahse, Cucurella a lo offside vangin goal-ah pawm a ni lo.

Lungawina

Liverpool pawhin Curtis Jones-a hmanga hmahruaina goal khungah an inngai a, mahse, hei pawh offside vang thoin pawm a ni lo. Reds tana Dominik Szoboszlai hun ṭha neih chu Filip Jorgensen-a'n ṭha zetin a dansak a, Hungarian midfielder hian post a tihper bawk.

Reds tana Virgil van Dijk-a crossbar tauh per pawh uiawm a tling a, bench aṭangin Alexander Isak lut mah se, ṭum dang ang thoin danglamna a thlen lo! Nomawi chawi loa season khar tur Liverpool-in Nottingham Forest B team laka 3-1 a tlawm Chelsea an hneh zo lo.

Liverpool hian tun season-ah 'Big Six' team zingah Manchester City leh Manchester United chu league-a an tawn vawi hnihah an hneh lo ve ve a, Arsenal leh Tottenham Hotspur lakah point li ve ve an hlawh chhuak a, Chelsea lakah point khat chiah an hlawh chhuak bawk.

Kop hoin coach Arne Slot ban an duh tawh a, mahse, Dutch manager hian inkhelh zawhah, "Nipuiah kan duh ang taka kan che thei a nih chuan season tharah chuan team dang daih kan ni ang tih hi 100% in ka sawi ngam a ni," a ti a, Anfield-ah a la cham hmel hle!