Mafela'n Odisha a chakpui

Indian Super League inkhelah Odisha chuan Zirtawpni zan khan 2-1 in Sporting Club Delhi an hneh a, Odisha tan Lalrinfela Khiangte (Mafela) chuan goal khat a khung - Mafela tan ISL-a a goal hmasa ber a ni.

Odisha tan hian Suhair VP chuan miniute lina lekah goal hmahruai khungin, minute 13-naah Mafela hian a belhchhah - Aizawl FC midfielder hlui hian box pawn aṭangin mawi zetin goal kilah a khung a, he goal a luh theihna tura K. Lalṭhathanga (Puitea) ball pek ṭha lutuk chu lam hmaih theih a ni lo.

Mafela tan ISL-a a goal hmasa ber a ni a, season hmasa khan Mohammedan tan ISL-ah lo inlan tawh mah se, goal a khung lo. Tun season-ah erawh Mafela'n goal a khung ta a, a team a chakpui bawk.

Sporting Delhi hian minute 74-naa Matija Babovic-a penalty hmangin si phurh sut ṭhen mah se, awmzia a nei phak tawh lo a, 2-1 in Odisha an chak - league match ruk zet a zawnin an chak lo tawh a, tunah erawh hnehna hlado an chham ve leh thei ta.

Odisha tan hian Mafela leh Puitea bakah Isak Vanlalruatfela leh Vanlalzuidika Chhakchhuak ten inkhel bul an ṭan a, Delhi club tan Augustine Lalrochana'n bul a ṭan ve bawk.