All India U14 tennis champion Hruaitluanga

India rama tennis player beiseiawm rualte inelna, All India Tennis Association Challenger Series 7 khelh zawh takah Mizo tan lawmna tur a awm - Boy's Under-14 ah Lalhruaitluanga Sailo chu a champion a, nomawi nen a lo haw.

All Assam Tennis Association (AATA) buatsaih inelna hi May 4 - 7 inkar khan khelh niin, AATA Complex, Guwahati-ah neih a ni a, Basil Khuma kaihhruaina hnuaia inlan Hruaitluanga hian seeded no. 4 ni chungin inelna hi a hmachhawn. Final-ah hian seeded no. 2 ni phak S Ebinesh a hmachhawn a, Telangana player beiseiawm hi 2-6, 6-3, 6-1 a hnehin, a champion ta a ni.

India ram tennis ranking, boy's U14 huanga number 167-na Hruaitluanga hian round of 32 aṭanga inelna hmachhawn ṭanin, a match hmasa berah hian Vivan Pansari chu awlsam takin, 6-0, 6-0 in a hneh a, round of 16-ah pawh harsatna nei loin, Nishant Das chu 6-0, 6-1 in a hneh.

Hruaitluanga hian quarterfinal-ah Udiit Praghan chu (8) 7-5, 6-3 a paltlangin, semifinal-ah Ayaan Rahman (6) 6-2, 6-1 a paltlang leh a, final-ah hian a tirah talbuai deuh mah se, insiamṭha leh vatin, Ebinesh-a hnehin champion nomawi a chawi ta a ni.