Champion mah se Inter an inthlahdah lo

Serie A champion Inter Milan chuan Inrinni zan khan 3-0 in Lazio an hneh a; Lautaro Martinez, Petar Sucic leh Henrikh Mkhitaryan ten goal khat ṭheuh an khung a, Lazio-in chhanletna tur an nei ve lo. Champion tawh mah se Inter an inthlahdah duh lo.

Mikhual tlangnel

Stadio Olimpico-a inkhelah mikhual team Inter an hlauhawm nghal a, minute rukna lekah goal an khung nghal. 'Throw in' aṭanga Yann Aurel Bisseck-a vawm luh chu Marcus Thuram-a'n tauh pialin, Martinez-a'n chiang zetin a hlap goal a, Inter hma a hruaipui.

Argentine forward Martinez tan tun season Serie A-a a goal 17 khungna chiah a ni a, midangin an khum theih a rinawm tawh loh a, top scorer a ni dawn.

Martinez a langsar chhunzawm a, minute 38-naah Andy Diouf nen mawi taka an in pass hnuah, Lazio defender te bumin Sucic tan a pe a, Croatian midfielder hian mawi zetin box pawn aṭangin a pet goal. Goal hniha hmahruai chungin Inter-in chawlhlawk an hmang.

Second half-ah bawk Inter an hlauhawm zel a, Yann Aurel Bisseck-a'n keeper a en chhin nghal. Lazio an vanduai a, minute 59-naah an defender Alessio Romagnoli-a'n Ange-Yoan Bonny chu hlauhawm taka a rah avangin hnawhchhuah a ni a, si hnih an phur tawh bawk avangin Lazio tan thawhchhuah ngaihna a awm tawh lo.

Minute 76-naah Bonny-a'n Lazio defender te a pawh khawm hnuah, ven loha awm Mkhitaryan tan a pe a, Manchester United leh Arsenal tan pawha lo khel tawh Mkhitaryan-a'n an chak nemnghehna goal atan a khung a, nuamsa takin Inter an chak.

Beiseina tlem

Lazio hi an chak loh avangin point 51 hmuin pariatnaah an awm chhunzawm a, paruknaa awm Como chu point 11 zeta an phak tawh loh avangin, league aṭang chuan season tharah Europe-ah an inlan thei tawh lo.

Mahse Lazio tan beisei tur a la awm a, Coppa Italia an champion chuan Europa League khelh theihna chance a la awm. May 13, Nilaini zan hian Lazio hian final-ah Inter bawk an hmachhawn leh dawn a, an tan Coppa Italia final baka phuba lakna hun ṭha a awm lo ang.