Leipzig-in Champions League khel dawn

Inrinni zan Bundesliga khelhah RB Leipzig chuan 2-1 in St. Pauli an hneh a, match khat chiah khelh tur awm tawhah pathumnaah awmin an lehpelh theih an ni tawh lo a, season tharah Champions League an khel dawn.

Red Bull Arena, Leipzig-a inkhelah mualneituin ball an chang hnem zawk a, first half tawp hma hretin Xaver Schlager-a'n an hmahruaina goal a khung.

Second half-ah thil a danglam lo a, Leipzig bawk a chungnung zawkah an ṭang. Minute 54-naah Willi Orban-a'n an hmahruaina belhchhah nan goal a khung ve leh.

Hun tawp dawnah St. Pauli tan Abdoulie Ceesay-a'n an siphurh sut ṭhen mah se, goal dang khungna hman a awm tawh loh avangin Leipzig an chak.

Leipzig hi tun season-ah an khel chhe lo a, season tharah Champions League an khelh dawn avangin player lakluh bakah, an neih sa te an chelh a pawimawh ang.

Hetihlai hian an winger Yan Diomande chu Liverpool-in an hel ve reng a, Reds hian Salah thlak nan sum tam tham tak nen an dawr a nih chuan Leipzig an ṭang rei thei kher lo ang.