Lakers an tho chhuak thei lo

NBA Conference semifinals khelh mekah Los Angeles Lakers an la tho chhuak thei lo a, nimin zing khan 131-108 in Oklahoma City Thunder an hneh lo leh a, seven game series-ah 3-0 in an hnufual tawh.

Crypto.com Arena, Los Angeles-a inkhelah team pahnihten bul an ṭan chhe lo a, mahse first quarter tawp lamah Lakers basket a tan rei deuh avangin 31-25 in Thunder-in hma an hruai. Second quarter-ah Lakers-in hma an sawn hret a, LeBron James bakah Austin Reaves te an khelh ṭhat avangin an phur a, 59-57 a hmahruai letin chawlhlawk an hmang.

Mahse third quarter-ah Lakers an inthlahdah a, hun lo taka ball an hloh ṭhin avangin OKC-in point an score hnem a, 90-79 in an hmahruaina an la let chiang hle. Fourth quarter-ah theihtawp chhuahin Lakers an ṭang a, point 29 score mah se OKC an phur laklawh a, point 41 zet an score belhin point 23-in a chak zawkah an ṭang.

Thunder tan Ajay Mitchell (24) leh MVP ni lai Shai Gilgeous-Alexander te an hmuhnawm lehpek a, Chet Holmgren (18) leh Cason Wallace (16) ten an thlawp ṭhat bawk avangin hnehna chan an phu. OKC hian Conference Finals lut turin game khat chiah chak an mamawh tawh.

Hetihlai hian Lakers tan khua a var thei lo a, Rui Hachimura (21), Luke Kennard (18) leh Austin Reaves te bakah an thiampuipa Lebron (19) te khel chhe lo mah se, an vanneih semifinals-ah an vanneih ṭum an tawng thei lo a, a vawi thum nan an tlawm.

Lakers hian Luka Doncic awm loh an tuar tih a lang a, semifinals paltlang an duh a nih chuan an chak vek a ngai tawh. Lakers leh Thunder te hi Thawhlehni zing dar 8-ah an inhmachhawn leh dawn a, Lakers tan chak loh a thiang tawh lo.

Inkhel dangah Cleveland Cavaliers chuan 116-109 in Detroit Pistons an hneh a, 2-1 in an inthauhna an tizim. Cavaliers tan Donovan Mitchell chuan point 35 score-in, rebound vawi 10 a la a, double double a siam. Cavs hi an chak avangin an phur thar a, finals lut turin beiseina sang tak an nei.