Betis tan beisei tur a la awm

La Liga club hlun Real Betis chuan Inrinni zan khan, an mikhualna ramah 2-2 in Real Sociedad an inhnehtawkpui a, mahse an chung chiah awm Atletico Madrid-in 1-0 a Celta Vigo an hneh loh avangin beisei tur an la nei.

Reale Arena-a inkhelah mikhual team Betis-in goal an khung hmasa zawk a, minute 38-naah Manchester United forward hlui Antony-a'n goal khungin a team hma a hruaipuin a, second half an ṭan deuh chiah tihah Abde Ezzalzouli-a'n khung ve lehin an hmahruaina a belhchhah.

Khualmualah Betis an chak mai dawnin lang hman mah se, Sociedad tan Orri Óskarsson-a'n minute 79-naah an siphurh a sut ṭhen a, injury time-ah Mikel Oyarzabal-a'n khung belhin team pahnihten point an insem.

Betis hian point 54 hmuin panganaah an awm chhunzawm a, palina Atletico chu point kuain an pha lo mek a, match thum khelh tur la awmah an vanneih chuan an la pawt thla thei. Mahse Betis hi an hnuai chiaha awm Celta Vigo nen point li chauhin an inthlau a, an chesual a nih chuan UCL bakah Europa League khel thei lo dinhmunah an ding.