Pathianni tlaiah India vs West Indies

India leh West Indies ten ODI match thum an khelhna tura a tawpna chu Pathianni tlai dar 1:30 hian Barabati Stadium, Cuttack-ah khelh a ni dawn. West Indies hi an match hmasa berah wicket riatin an chak a, match hnihnaah India-in run 107-in an hneh let. Tunah hian series 1-1 a nih chiah avangin inkhel pawimawh a ni.

Visakhapatnam-a an inkhelh ṭumin India opener pahnih Rohit Sharma (159) leh KL Rahul (102) ten century an siam ve ve a, Virat Kohli-a'n run khatmah siam lo mah se over 50-ah run 387/5 an siam thei a. Series la zawk tur zawnnaah hian mualneitu India hi dinhmun ṭha zawk an ni ang.