Bagan-in an hun ṭha neih bawhpelh

Mohun Bagan chuan Indian Super League table chung ber luahna remchang an neih chu an bawhpelh - Inrinni zan khan an mikhualna ramah FC Goa chu 1-1 in an inhnehtawkpui a, an hmelma, table chung ber luahtu East Bengal nen match 10 ve ve khelin point 21 ve ve an hmu.

Bagan hian Jamie Maclaren hmangin goal hmahruai khung mah se, Goa hian Ronney Willson Kharbudon hmangin an chhanglet a, goal dang a luh loh avangin 1-1 in inkhel a tawp zui - goal difference-ah East Bengal an sang zawk a, Kolkata derby a nghahhlelhawm ta sawt.

Kolkata club tan hliam vanga a chawlh reng hnuah Lalengmawia Ralte (Apuia) chu a lo kir leh ta a, hetihrual hian FC Goa tan Ayush Chhetri chuan inkhel bul ṭanin, striker Daniel Lalhlimpuia chu bench aṭanga luhtir a ni thung.

Inrinni zan inkhel dangah Bengaluru chuan 1-0 in Jamshedpur an hneh a, Ryan Williams chuan inkhela goal awmchhun a khung. Bengaluru tan Bawngkawn tlangval Lalremtluanga Fanai chuan inkhel bul ṭanin, Jamshedpur tan Republic Veng tlangval Lalhriatpuia Chawngthu chuan bul a ṭan bawk.

JFC (21 pts) leh Bengaluru (20) ten champion beiseina an la nei ve ve a, mahse, match khat chiah khelh tur an neih tawh avangin, champion tur chuan thil danglam a thlen a ngai tawh dawn thung.