Spanish La Liga a ngaihnawm zel dawn
Barcelona, Real Madrid leh Atletico Madrid awmna a nih miau avangin Spanish La Liga-in ngaihven a hlawh lo thei lo a, kartawp inkhelah club pathum an inlan kim vek dawn.
Spanish football lam pawhin Krismas chawlh an hmang dawn a, tun kar tawp inkhel hi kum 2019 atana La Liga inkhel kan hmuh hnuhnun ber tur a ni ang. Barcelona chuan zanin dar 8:30-ah Alaves an mikhual dawn a, Pathianni zan dar 8:30-ah Atletico Madrid-in Real Betis an lenchilh ang a, zan dar 1:30-ah Real Madrid chuan Athletic Bilbao an mikhual thung ang.
Busquets a chiang lo
El Clasico-a beisei phak lo Barcelona-in Alaves lakah insiamṭhatna remchang an nei dawn a, hetihrual hian midfielder pawimawh Sergio Busquets chu dam lohnain a tlakbuak mek.
Busquets hian club training pawh a zawm thei lo a, El Clasico-ah pawh khan bul a ṭan thei lo - a tel loa Barcelona midfield ngai awh lohzia kan hmu a, Alaves lakah a khelh leh khelh lohin thui takin result tur a hril ang.
Real laka holam taka a chance ṭha hlahtu Lionel Messi a pawimawh dawn a, ani bakah hian Luis Suarez leh Antoine Griezmann ten an theihna anga an khelh chhuah chuan Alaves tan chak beisei ngam chi a ni kher lo ang.
Hei le Atletico
Atletico Madrid-in league match thum zet hnehna an chan zawh loh hnuin Pathianni zan khan Osasuna chu 2-0 in an hneh a, an phur chho ṭan leh mek.
El Clasico-a Real Madrid leh Barcelona inhnehtawk kha Atletico tan chuan result duhthusam a ni a, hetihrual hian match 17 khelh tawhah club pahnih hi point sarihin an phak lo. Atletico-in rilru hahdam leh nuam taka Krismas hman an duh chuan zaninah Real Betis hneh an mamawh a, an chak zo lo a nih chuan Real leh Barca an thlir liam a ngai ang.
Real ve thung
Pathianni zan dar 1:30-ah Real Madrid-in Athletic Bilbao an mikhual dawn a, Eden Hazard leh Marcelo te an inlan thei dawn lo chhunzawm zel. Midfielder pawimawh Casemiro chu hrem vangin a inlan thei dawn lo bawk a, beisei phak lo sa Real tan player pawimawh pathum tel lo tur hi a pawi pha ang.
Hetihrual hian Athletic Bilbao hi an league match hnuhnung pahnihah an chak zo tawh lo a, Real khelmuala chak an tan a harsain a rinawm.