Zaninah Manchester City vs Leicester City

Premier League champion tura beisei la nei pha Manchester City leh Leicester City te zanin dar 11:00 hian Etihad Stadium-ah an inkhel dawn. Champion lai Pep Guardiola hote hian hnehna pawh chang ni se Foxes hnuaiah an la awm chhunzawm dawn a, chutihrualin an intlauhna an tizim thei lo a nih chuan champion a harsa ṭalh tawh ang.

Man City-in chanchin duhawm loh an nei chhunzawm zel a, Arsenal-in Pep-a thachhang dawltu Mikel Arteta an chhuhsak. Hei chauh hi ni loin Spanish manager Pep pawh hi a club hlui Barcelona-in an thlem tih thawm a awm a, January thlaa let tura beisei Leroy Sane lahin an ram club Bayern Munich zawm a duh.

Khelmual chhehvelah boruak ṭha lo karah Man City-in pahnihna hauh mektu Leicester an hmachhawn dawn a, Foxes hian league match hnuhnung berah Norwich City nen inhnehtawk mah se Arsenal hnehtu leh Southampton 9-0 zeta sawp theitu an ni.

Etihad Stadium-ah erawh Man City hi ball chang tur tam zawk a ni dawn a, chutihrualin Foxes-in counter atttack hmangin awmze nei taka vuak let an tum dawn. Leicester striker Jamie Vardy-a'n tun season-ah goal 16 zet a khung tawh a, English striker hian a tlan chakna hmangin City tlarhnung pawp lai nan fuh a tum ngei ang.

Man City pawh Manchester Derby-a an chak loh hnuah an insiam ṭha leh tawh a, big club zinga mi Arsenal 3-0 zeta an sawp bakah player chhawr ngai loh ṭhahnem tak hmang chungin League Cup semifinal lut turin Oxford United 3-1 in an sawp leh bawk. Pep hoten khelmualah an theihna an pholang ṭhin a, chutihrualin an elpui Foxes lakah point an hloh chuan champion beiseina a tawp chauh ni loin pahnihna ni tur pawhin thapui chhuah a ngai chho ang.