A pa sun mah se, Flick a champion

Barcelona manager Hansi Flick-a'n El Clasico-a Real Madrid nen an inhmachhawn hmain a pa thih thu a hria a, hun harsa takah a team tan dingin, Real an hneh a, La Liga nomawi an chawi zui.

Flick chuan, "Tukin zing khan ka nuin min rawn call a, ka pa thih thu min hrilh. Ka hun tawn chu ka zep dawn nge, ka sawi dawn tih ka inngaihtuah a, he club hi ka chhungkua ang mai a nih avangin sawichhuah ka thlang ta a ni," a ti.

German coach chuan a player-te fak zuiin, "Club leh player tena ka tana an thil tih hi ka hre reng dawn a ni," a ti a, hun harsaah pawh a tan theihtawp an chhuah avangin lawmthu a sawi.

May 2024-a Xavi a thlak hnua nomawi panga chawitu Flick chuan, "Match awlsam lo tak kan hmachhawn a, vawiin hi ka theihnghilh tawh ngai lo ang. Ka player te leh he club min thlawptute zawng zawng chungah lawmthu ka sawi a ni.

"Hetiang ang team ṭha tak ka enkawl thei hi ka inchhuang em em a, engkim avangin ka lawm e. Tunah chuan hlim taka champion lawm a hun ta," a ti. Pathianni zana El Clasico khelh a nih hma khan Barca leh Real Madrid-te chuan Flick chu a lusunnaah an tawrhpui thu an pholang a ni.