Premier League-a cham tur Forest

Nottingham Forest chuan season tharah Premier League an khelh chhunzawm zel dawn - Pathianni zan khan an mikhual Newcastle United chu 1-1 in an inhnehtawkpui a, a hnu inkhelah West Ham an tlawm zui avangin EPL khel zel turin an him. February-a Forest coach ni tura Sean Dyche thlaktu Vitor Pereira-a'n a hna a hlen.

Forest khelmuala inkhelah goal a lut lawk lo. Minute 74-naah Harvey Barnes chuan Magpies tana khungin, an chakpui mai rinna a lian hman hle - mahse, nipui transfer-a thawm nei na tur Elliot Anderson a inlar a, a club hlui lakah Forest tan si phurh a sut a, a team a chhanhim.

Kum 23 mi Elliot Anderson hian July 2024 khan Newcastle chhuahsanin Forest hi a zawm a, khatihlaia a man zat kha pound maktaduai 35 a ni - tunah chuan Forest hian £100mtd aia tlawma hralh an tum tawh lo niin an sawi!

Anderson-a'n season thara EPL an khelh zel theih nan Forest a chhanhim a, season tharah erawh Manchester City leh Manchester United ten lakluh tuma an ngaihven avangin club thar a neih ngei a rinawm.

West Ham tlawm avanga Forest an him rual hian Leeds United pawh an him ve nghal a, nizan khan Tottenham Hotspur nen inkhelin, an result kan hre hman lo - EPL aṭangin Burnley leh Wolverhampton Wanderers chu tla chiang tawh an ni a, Spurs leh Hammers zinga pakhat zawkin an zawm ve leh ang.