A vawi khat nana ISL goal khungtu BD-a

NorthEast United forward Lalbiakdika chuan ISL-ah a vawi khat nan goal a khung a, a team NorthEast United chu Chennaiyin FC lakah 4-1 in hnehna a chanpui.

Highlander tan Jairo Samperio chuan first half-ah goal hnih a khung a, minute 70-naah Chennaiyin defender Laldinliana Renthlei chuan an lamah a tilut zui.

Mahse, Dinliana vek hian minute 81-naah Chennai club tan si phurh a sut ṭhen a, 3-1 a ni. South Indian club harh erawh a tlai hret tawh a, minute 90-naah BD-a'n chak nemnghehna goal a khung.

Aizawl FC forward hlui BD-a shot chu Mohammad Nawaz-a'n dang zet mah se, a dang nghet zo lo a, an lamah a lut - BD-a tan ISL-a a goal hmasa ber a ni.

Highlander tan BD-a hi minute 84-naah bench aṭanga lut ve chauhin, khelmualah minute ruk chauh hun a hmang hman tihin goal a khung - NorthEast tan Mizo player dang an inlan lo.

Chennaiyin tan Laldinliana Renthlei, PC Laldinpuia leh Lalrinliana Hnamte ten inkhel bul an ṭan vek a, an team erawh an chakpui zo ta lo.

Pathianni zan inkhel hmasa zawkah Kerala Blasters chuan 3-1 in Mohammedan SC an hneh. Blasters tan hian Francisco Feuillassier, Víctor Bertomeu leh Sreekuttan M S ten goal khat ṭheuh an khung.

Mohammedan tana Mahitosh Roy goal khung chu mualpho zualpui khuhna chauh a tling tawh. Blasters tan Freddy Lallawmawma chuan inkhel bul ṭanin, Kolkata club tan Lalthankima, Joseph Lalmuanawma leh Lalngaihsaka ten bul an ṭan a, bench aṭangin Rochharzela leh Jeremy Laldinpuia te an lut thung.

Blasters hian coach atana Ashley Westwood an lakluh hnuah league match ruk khelin, vawi li an chak ta a, vawi khat tlawmin, vawi khat an draw - English coach an lakluh hma hian league match nga khel hmanin, point khat chiah an nei!