Wemby hnawhchhuah zanah Spurs chak lo

NBA Conference Semifinals khelh mekah nimin zing khan Minnesota Timberwolves chuan 114-109 in San Antonio Spurs an hneh a, second quarter-ah Spurs center Victor Wembanyama chu hnawhchhuah a ni a, Spurs hi tlawm zuiin, seven game series-ah 2-2 in an inhnehtawk chiah a, Wolves-in Spurs an nihrual.

Target Center, Minnesota-a inkhelah team pahnihte an hmuhnawm nghal a, first quarter-ah Wolves chungnung hretin 34-30 in hma an hruai. Second quarter minute thum vel chauh an khel hman tihin, Wemby-a rebound la chu Naz Reid leh Jaden MCDaniels ten an chuh nghal a, Wemby-a'n Reid hi chiang takin a nghawk tlu a, eject zui niin, French center tel loin Spurs an khelh chhunzawm a ngai. 60-56 a hnufual chungin halftime an hmang zui.

Third quarter-ah Spurs an khel ṭha a, Luke Kornet-a'n Wemby hmun ruak a hnawh khat ṭha a, 84-80 a hmahruai chungin third quarter an khar. Mahse fourth quarter-ah Wolves an khel ṭha zawk a, Anthony Edwards hoin Spurs an lehthal a, a dingchang zawkah an ṭang.

Wolves tan Edwards a khel ṭha takzet a, point 36 teh meuh a score. Wolves tan player pariat chiah khel mah se point nei lo an awm lo a, point nei tlem ber pahnih - Mike Conley leh Terrence Shannon Jr. pawhin point riat an nei.

Spurs tan Dylan Harper, De'Aaron Fox (24) leh Stephon Castle (20) te an khel ṭha a, mahse an ṭhiante puihna an dawn ṭhat loh bakah Wemby awm loh an tuar a, court a chhuahsan hmaa point li chiah nei hmanin, team tan a thawh hlawk lo hle.

Wemby hi eject ni mah se a foul dan hi NBA dan bua Flagrant Foul II a ni a, dan ang chuan Wemby hi hnawhchhuah tur a ni a, mahse suspend a nih dawn loh avangin Spurs-in game 5-ah Wemby an chhawr theih an inbeisei.

Team pahnihte hi May 13, Thawhlehni zing dar 5:30-ah an inhmachhawn leh dawn a, semifinals paltlang turin match hnih chak an la mamawh ve ve.

Inkhel dangah New York Knicks chuan 144-114 in Philadelphia 76ers an hneh a, Conference finals lut hmasa ber an ni. Knicks hi series-ah 4-0 in an chak a, Sixers-in an ngam meuh lo. Knicks hi Detroit Pistons leh Cleveland Cavaliers-a chak zawk nen finals-ah an inhmachhawn ang.