United-in Pogba hralh dawn lo

Manchester United manager Ole Gunnar Solskjaer chuan January thlaah Paul Pogba an hralh loh tur thu nimin tlai khan a tichiang a, Erling Haaland nen inhmu tura thuthang awm pawh dawt a nih thu a sawi bawk.

Norwegian manager Solskjaer chuan, "January thlaah kan hralh dawn lo," tiin Paul Pogba chhuahtir an tum loh thu a sawi a, France midfielder hi hliam vangin a chawl mek. United boss chuan sawi chhunzawmin, "Kumin chhung ngeiin a rawn let theih kan beisei a, amaherawhchu inhliam nawn laka inven nan a dam chian hnuah chauh a inlan ang," tiin a sawi.

Manchester United hian Pathianni zan dar 7:30 hian Vicarage Road-ah Watford an tlawh dawn a, Pogba tel a beiseiawm lo. Solskjaer-a hote hian Manchester Derby-ah hnehna chang mah se an mualah Everton nen an inhnehtawk a, season thara Champions League khelh an tum a nih chuan Watford laka point thum an hmuh ngei a ṭul tawh.

United hi tun hnaia striker hming langsar tak Erling Haaland nen sawi zawm a ni a, kum 19 mi Red Bull Salzburg striker hi a pa nen Stavanger aṭangin Manchester an pan niin Norway chanchinbu ten an sawi. Amaherawhchu Solskjaer chuan, "Man-chester lam a pan ka ring lo a, ka hriatpui lo bawk. Krismas chawlh lai a ni a, Stavenger aṭangin khawi hmun pawh a pan thei. Manchester khawpui chu a kalkawng pakhat ve chauh a ni thei a, kan ngaihruat nasa mah mah a ni," tiin Molde a enkawl tawh Haaland chungchang a sawi.