League hniam lama kal hreh lo Lewy

Barcelona striker Robert Lewandowski chuan season tharah chuan league hniam lam zawka kal a pawi tih loh thu a sawi a, a kum a tam tawh avangin European top five league-a khelh chhunzawm kher a tum lo.

Kum 37 mi Lewy hian season tawp rualin Barca-a a contract a hmang zo tawh dawn a, Catalan club hian hlawh hniam zawk hlawh turin contract thar an zawrh niin an sawi.

Hetihlai hian Major League Soccer lam pawh sawi rik niin, Chicago Fire hming a ri ring hle. Lewy chuan, "Kum 38 ka ni ve dawn tawh a, league hniam lam deuh khelh pawh ka pawi ti tawh lo.

"Ka taksa lam chu la inpeih viau mah se, nuam taka nun hmang chunga inkhelh hi a hun ve tawh em, tihte pawh ka ngaihtuah ve a ngai a ni," a ti a, Europe a chhuahsan a nih pawhin a mak lo ang.

Lewy hian Barca-ah hmun pawimawh ber chang tawh lo mah se, tun season-ah pawh match 43 lai a la khel a, goal 18 lai khungin, assist vawi li a la nei thei - a kum tam tawh mah se, a la chhawr tlak hle.