Palace leh Everton inhnehtawk

Everton-in European football-a kir an beiseina chu tihderthawn sakin an awm - Pathianni zan khan Crystal Palace lakah vawi hnih ngawt hma hruai mah se, an si phurh an sut zawhtir ve ve a, 2-2 in inkhel a tawp.

Merseyside club tan James Tarkowski chuan minute rukna lekah goal hmahruai a khung a, minute 34-naah Ismaila Sarr chuan si phurh hi a sut zui. Mahse, Everton tan second half ṭan aṭanga minute hnihna lekah Beto-a'n a khung leh a, David Moyes-a naute an phur hman hle.

Mahse, Europa Conference League final khel tur Palace tan Jean-Philippe Mateta chuan si phurh sut ve lehin, 2-2 in inkhel a tawp a, point khatah Everton-in lungawi an zir.

Premier League-ah pangana chinin UEFA Champions League an khel dawn a, paruknain Europa League khelin, pasarihna chuan Europa Conference League an khel dawn thung.

Hetihrual hian Villa-in Europa League final an luh avang leh, FA Cup final-ah Manchester City leh Chelsea an inhmachhawn dawn avangin, result a zirin EPL table-a pariatna tan pawh Europe a beisei theih dawn.

Mahse, Everton-in an hun ṭha neih an bawhpelh a, table-ah 10-na niin, pariatna Brentford chu point hnihin an phak lo a, kalphung pangngai anga Europa Conference League khel thei tur, pasarihnaa awm Brighton & Hove Albion chu point liin an phak lo mek - league match hnih chiah khelh tur a awm tawh.