Milan dinhmun a derthawng

Serie A club AC Milan tan khua a var hleithei lo a, Pathianni zan khan 3-2 a Atlanata an hneh loh avangin palinaah an tla a, season tharah Champions League khel lo thei dinhmunah an ding.

Atalanta tan Ederson, Davide Zappacosta leh Giacomo Raspadori ten goal khat ṭheuh an khung a, Milan tan Strahinja Pavlovic leh Christopher Nkunku te goal chu Milan chhanhim nan a tawk lo.

San Siro-a inkhelah mikhual team an hlauhawm zawk a, minute sarihna lekah Ederson-a'n goal kilah tak pet lutin, a team hma a hruaipui. Milan an talbuai chhunzawm a, minute 29-naah Chelsea defender hlui Zappacosta-a'n an hmahruaina belhchhah a, 2-0 a hmahruai chungin chawlhlawk an hmang.

Second half-ah pawh Atalanta bawk an hlauhawm chhunzawm a, minute 51-naah Raspadori-a'n kawh zetin an goal thumna a khung a, Milan keeper Mike Maignan-a'n a dang zo lo.

Goal thum an chhuah hnuah Milan an insiamṭha ṭan chauh a, goal erawh an khung thei lawk lo. Minute 88-naah Samuele Ricci-a ball vawrh aṭangin Pavlovic-a'n a tauh goal a, an si phurh a sut ṭhen. Hun pek belhah Nkunku-a'n penalty aṭangin a pet goal leh a, mahse goal dang khungna hman a awm tawh loh avangin Atalanta an chak.

Milan hi season chanve thleng kha chuan champion an inbeisei a, mahse tawlhthluk an chin avangin an hmelma Inter Milan lakah nomawi an chân tawh. An match hnuhnung pangaah vawi khat chiah an chak a, an hmabak match hnihah an chesual leh a, an hnuai a awmte an chak a nih chuan UCL an khel thei dawn lo.