India U17-in Asian Cup an thlah

AFC Under-17 Asian Cup 2026 chu India U17 chuan an mangṭha ta a, FIFA U17 World Cup khelh an beiseina pawh an thlah tel nghal - Pathianni zan khan an match hnuhnung berah Uzbekistan chu 3-0 in an hneh lo.

Saudi Arabia-a neih inelnaah hian India an vanduai a, group D-ah team ṭha Australia, Uzbekistan leh North Korea an awmpui a, North Korea hi inelna aṭang hian an la inhnukdawk zui.

Blue Colts hian an match hmasa berah Australia hmachhawnin, 4-0 in an tlawm nghal. Uzbekistan hi hneh ta se, quarterfinal lut thei an la ni cheu - draw pawh ni se, Nilaini zana Australia-in 4-0 a Uzbekistan an sawp chuan an la tlang thei bawk.

Mahse, Uzbekistan hian Laziz Abduraimov (penalty), Wangkhem Denny Singh (own goal) leh Akhrorbek Ravshanbekov-a goal hmangin 3-0 in an hneh a, India beiseina a tawp.

India U17 squad-ah hian defender Lawmsangzuala chu Mizo player awmchhun a ni a, Khawzawl rawlthar hian inkhel pahnihah bul a ṭan ve ve - India U17 ten quarterfinal lut zo lo mah se, tawnhriat ṭha tak a tling.

AFC U17 Asian Cup hi vawi 21 neih a nihna chiah niin, India hian vawi 10 he inelna hi a lo hmachhawn tawh - a thlen san berah quarterfinal lutin, kum 2002 leh 2018 khan a thiam pariat zingah an tel.