Villa an chak thei lo

Europa League final lut Aston Villa an chak thei meuh lo - league match thum chu a zawnin an chak zo ta lo. Villa hian Pathianni zan khan Burnley chu khualmualah lenchilhin, 2-2 in an inhnehtawk.

Premier League aṭanga tla tawh Burnley hian Jaidon Anthony hmangin goal hmahruai an khung hial a, Villa-in Ross Barkley leh Ollie Watkins hmangin an chhanglet - an chak ngei dawn niin a lang hman.

Mahse, an goal hnihna an chhuah aṭanga minute hnih hnu lawkah Zian Flemming chuan Burnley tan a khung ve leh a, goal dang lut tawh loin, 2-2 in inkhel a tawp zui ta a ni.

Season chawhnu lamah Villa hian beisei an phak lo a, season tharah Champions League an khel lo mai thei - league match hnih chiah khelh tur awm tawhah Liverpool leh Manchester City an hmachhawn dawn!

Villa hian table-ah pangana dinhmun luah mekin, point 59 an nei a, parukna Bournemouth aia an san zawkna hi point li chauh a ni.

Mahse, Unai Emery naute hian Europa League final khelh tur an la nei a, league hmanga UCL an inpetkai zo lo a nih pawhin Champions League khelh theih dan kawng dang an la nei.