Spurs-ah Alderweireld a nghet

Tottenham defender Toby Alderweireld chuan kum 2023 thleng daih contract a ziak thar a, manager thar Jose Mourinho kaihhruaina hnuaiah hmun pawimawh a chang chhunzawm ang.

Belgium international hian July 2015  khan Atletico Madrid aṭangin Spurs hi a pan. North London club tan hian inelna hrang hrangah match 179 khel tawhin, season hmasa bik phei kha chuan match 58 an khelh zinga 50 ngawtah a inlan - tun season bikah pawh Premier League match 17 an khelh tawh aṭangin vawi 16 zet a bul ṭantu zingah a tel phak.

Manager thar Jose Mourinho kaihhruaina hnuaiah Tottenham hian boruak an nei ṭha leh mek, league-ah pangana dinhmun an luah leh der tawh. Pathianni zan dar 10:00 hian Mourinho-a club hlui Chelsea an mikhual dawn; Portuguese manager tan inkhel pawimawh bik a ni dawn.

Blues hi Mourinho-a'n a kaihhruai ṭhin Frank Lampard enkawlna hnuaia khel an ni. Ṭum danga an inkhel aiin London Derby hian ngaihven a hlawh zual ngei ang.