MRB Pro Volleyball League 2026 ṭan a ni ta

Mizoram Rural Bank Pro Volleyball League 2026 chu Thawhṭanni zan aṭangin LPS Arena, Falkland-ah khelh ṭan a ni a, mipa inelnaah Anastasia Electric Veng chuan Thutak Nunpuitu Team chu 25-21, 25-27, 25-7, 25-17 (3-1) in an hneh nghal.

Zanin dar 8:00 hian Sihphir leh Chhinga Veng Spikers te an inkhel ang a, nizan khan Tuichangral leh Khawbel te inkhelin result kan hre hman lo. PVL-ah hiah mipa team pasarih leh hmeichhe team pali an tel a, an ball hman hi Nivia-in PVL atan bika an siam 'Vakul' a ni.

Pro Volleyball League vawi kuana hawn zanah champion lai Anastasia-in trophy humhim ngei an tum a, 2025 final-a an hneh TNT an hneh nawn. Anastasia chakna zat hi 3-1 tho ni mah se tun ṭumah hian an chak awlsam zawk.

Nikum final-ah khan TNT tan Zosangzuala (Mama) a inlan a, kuminah Anastasia-ah lutin a club lakah point 17 a hmu a, point hloh a nei lo. Anastasia tana a khelh hmasak berah Kuriz Player of the Match a ni nghal.

2025 champion team player pawimawh Karthik, Laldinsanga, Lalruatsanga, setter Ramdintluanga ten Anastasia-ah hmun pawimawh luah zui zel a, Mama bakah Mizo player langsar dang Zomuansanga te an neih belh avangin Electric Veng club hi champion nawn thei turin an ṭha tawk.

TNT erawhin nikum final-a an rinrawl player paruk zingah captain Vanlalchhantluanga Sailo chiah an kawl zui a, 2025 Mizo Best Player Vanlalṭanchhana bakah Mama, Saidingpuia Sailo, Sadrak Fanai leh K Zodingliana te an chhuak. Opening match aṭanga a lan dan chuan TNT player-te an ruh a lo no deuh. Chutihrualin tualchhung volleyball-a team langsar TNT hi an tlo viau zel.

Mizoram Volleyball Assocition chuan hun bikah mi bik tan hun an hmang. Inelna ṭan hmain Anastasia player Lalnunfela (26) sunna hun hman a a, MVA hruaitu zinga Aizawl Municipal Corporation inthlana tling thar president Dr Lalmalsawma Nghaka (Ward XIX) leh adviser VL Zamlova (Ward XV) te hnenah lawmpuina thuziak hlan an ni bawk.