Kulikawn tan Republic Veng an ṭha hret

MBOCWWB 8th Inter Village/ Local Council Football Tournament semifinal second leg-ah Republic Vengin Kulikawn 4-0 in an sawp a, first leg nena belhkhawmin 6-0 in hnehna an chang.

RG Stadium-a inkhelah Republic Veng tan F. Lalrinpuia a langsar a, Valpuia hian goal khat khungin H. Lalfakzuala'n goal hnih a khung bakah Lalnunzira'n goal khat a khung bawk.

Nimin tlai inkhelah Kulikawnin bul an ṭan ṭha a, lehthal ngei tumin na takin an rawn nawr nghal. Mahse an chance ṭha an hlah a, Republic Vengin keeper ṭha RS Lallawmzuala leh defender ṭha Laltluangliana te an kawl avangin tlarhnung a nghing zui lo.

Republic Veng an insiamrem a, player ṭha bik Valpuia'n minute 22-naah goal ropui khungin first half tawp hma chiahin a freekick pet chu Faktea'n goal-ah a chantir.

Chutihrualin 1-0 a nih laiin Kulikawn hian penalty hmangin siphurh sut theihna an nei a, captain Hruaia pet ṭha mah se keeper Rsa'n a dang. Hemi hnu hi chuan Republic Vengin nuam sain an khel tawh.

Second half-ah Republic Vengin Faktea leh Zirtea hmangin an khung belh a, goal tam zawk khung tum loin player ṭha la chhuakin final an thlir ta thung. CYMA Football champion laiin Inter Village Football-ah final an lut a, semifinal-ah entu nei ṭha viau mah se nomawi inchuhnaah entu an la nei ṭha zawk dawn.