East Bengal-in goal khung thei lo

Indian Super League hmahruaitu East Bengal chuan Thawhṭanni zan khan Punjab FC chu 0-0 in an inhnehtawkpui a, ISL hmahruaitu an nihna chu a derthawng zui.

East Bengal hian he thu buatsaih a nih lai hian, point 22 neiin ISL table chung ber an la luah a, mahse, nizan khan Mohun Bagan an inlan a, an chak chuan khelh zat inangah point hnihin East Bengal an tlansan ang - he thuziak i chhiar meuh chuan a chiang tawh ang.

Kolkata club tan Lalchungnunga chuan inkhel bul ṭanin, rin loh takin Edmund Lalrindika chu bench lamah a awm tluan a, David Lalhlansanga pawh khelmualah luhtir a ni lo.

East Bengal hian tun season-ah buaina neuh neuh an nei reng a, Punjab nen an inkhelh hma lawk pawh hian head coach Óscar Bruzón chuan na takin club legend pathum Alvito D’Cunha, Syed Rahim Nabi leh Sandip Nandy te chu a sawisel.

Oscar chuan, "He club-in nomawi a chawi theih dan tur leh a hlawhtlin theih dan tur an sawi ngai lo a, an sawisel ve tawp a ni ber. He club hlawhtlin hi an duh lo a, keimah mai ni loin, ka player-te thlengin an sawisel a ni.

"Fan-te hnena ka sawi duh chu, anni ho hi club tana mi ṭha lo an ni, tih hi a ni," a ti! Alvito chuan Oscar hi chhangletin, "A thusawi ka ngai pawimawh lo. Fans ho an hlim ka duh ber," a ti.

Rahim Nabi chuan, "Ka hming pawh lam dik thei loin Rahim Ali min ti a, hetiang taka huaisar tur hian eng nomawi nge a chawi tawh? Nomawi chawi phawt se, a thusawi chu ka ngaithla ang," a ti ve bawk.

Oscar hi ṭhenkhatin an thlawp laiin, nomawi inchuh boruak san lai taka a ṭawng dan chu tam takin an dem thung - Punjab an draw zui bawk si! Mahse, Spanish coach a hlauthawng lo.

Real Mallorca assistant coach hlui chuan, "Kan hmabak match hniha kan chak chuan kan champion dawn a, zanina point kan hlawhchhuah hi a hlu hle a ni," a ti a, nomawi chawi a la inbeisei.

Nizanah Bagan lo chak ta pawh ni se, East Bengal hian Kolkata derby-ah an hmelma kumhlun hi an la hmachhawn dawn a, Oscar-a sawi angin hmabak match hniha an chak chuan an la champion thei a ni.