Chelsea-in coach tur an zawng ṭan

Premier League club lian Chelsea chuan season thar atana coach tur zawn hna an ṭan a, Real Madrid ban tak Xabi Alonso chu hming ri ring ber a ni - ani bakah hian Bournemouth coach Andoni Iraola leh Fulham coach Marco Silva pawh sawi rik a ni.

Crystal Palace head coach Oliver Glasner pawh ngaihven zingah a tel a, Stamford Bridge thuneitu zingah, club player hlui, Flamengo-a coach anga hlawhtling zui tak Filipe Luis leh beisei phak baka Serie A club kaihruaitu Cesc Fabregas duhtu pawh an awm nual.

Chelsea hian July-a pre-season training ṭan hma ngeia coach thar neih hman hi an duh a, Alonso hian London club zawm hi a hreh lo hle nia sawi a ni. Mahse, Blues lam hian coach hrang hrang zirchian phawt an duh.

Alonso hian season ṭan dawn khan beiseina sang tak nen Real Madrid a pan a, mahse, January khan Spanish club hian an ban - club dang zawm loin a awm zui a, Bayer Leverkusen tana Bundesliga nomawi chawi thei coach hi Blues fans tam tak chuan an iai lo khawp ang.

Hetihrual hian Iraola, Silva leh Glasner ten tunah club enkawl lai la nei vek mah se, season tawpah an chhuak dawn tawh a, coach lakluh nana zângnadawmna sen ngai lo tur ringawt pawh hi Blues tan thil lawmawm a ni.

Glasner hian season tawpah Palace a chhuahsan tur thu a tichiang tawh a, Europa Conference League final luhpui tawhin, champion nomawi an chawi a nih ngat chuan duhtu an pung sawt ang - season hmasaah FA Cup champion a nihpui tawh.

Iraola pawhin Bournemouth chu EPL table-ah parukna a nihpui mek a, season tharah European football an khelh ngei a beiseiawm. Mahse, kum 43 mi coach hian contract thar ziak loa chhuah a thlang a, Palace-in Glasner thlak turin an dawr tawh.

Mahse, Iraola hian season khat chu chawlh hahdam a pawi ti lo niin an sawi. Silva-a'n Fulham-ah a contract a hmang zo tawh dawn a, kum thum dang atan contract thar zawrh ni mah se, a la ziak lo.

Silva hi Saudi Pro League lam pawhin an hel ve reng a, hausak thut a duh chuan Saudi lam panin a puanthuah a tel mai thei - Blues coach zawn chanchin hi a ngaihnawm chho dawn chauh niin a lang.