World Cup-ah Dybala khel dawn lo

Argentina head coach Lionel Scaloni chuan World Cup 2026 atan preliminary squad a puang a, player 55 zingah pawh Paulo Dybala a tel lo - kum 32 mi a nih ve tawh avangin Dybala tan international football zinkawng a tawp ta ang hial pawhin a sawi theih.

AS Roma forward Dybala hian Argentina squad-a hmun chang turin season a hmang ṭha tawk lo. Season hman mekah Italian club tan match 25 khelin, goal thum chauh a khungsak a, assist vawi nga a nei thung.

Dybala hian Roma-ah hian hmun pawimawh a chang phak lo. Match 25 a inlan zinga match 10-ah hian bench aṭanga luhtir a ni a, vawi kua lakchhuah a ni bawk - season tawpah a contract a hmang zo tawh dawn a, a hma hun a chiang lo mek.

Argentina tan vawi 40 inlana goal li khungtu Dybala hi World Cup 2022-a champion Argentina team-ah khan a tel a, mahse, kum 2024 hnuah ram tan a inlan leh tawh lo - koh a ni lo hi a mak hran lo a, hming langsar a nih avangin thawm erawh a lian lo thei lo thung.

World champion Argentina tan player 55 hming phochhah phawt a nih avangin, Dybala tih loh, hming langsar koh loh an awm rih lo a, Inter Miami forward Lionel Messi, Atletico Madrid forward Julian Alvarez leh Inter Milan striker Lautaro Martinez te ho chu squad-ah an awm a, tlarhma chu an la ṭha rem rem hle - Chelsea forward Alejandro Garnacho pawh a tel.

Player hi 26-a la tihhniam leh tur a nih avangin lawm chiam erawh a la rem lo. Argentina hi World Cup-ah hian group J-ah Algeria, Austria leh Jordan te nen an awm ho a, an match hmasa ber chu June 17, zing dar 6:30-ah Algeria nen an khel dawn - inkhel en tura meng rei ṭhang ho tan thawh hma a ngai dawn e!