Lazio leh Inter-in nomawi inchuh dawn

Italian club hlun pahnih Lazio leh Inter te an intawng leh dawn a, zanin dar 12:30 hian Coppa Italia nomawi inchuhin an inkhel dawn. Inter tan tun season-a nomawi pahnih an hlawh chhuah theihna tur a nih laiin, Lazio tan Europa-a inlan theihna a ni dawn a, khelmual chhungah nomawi inchuhin an inbei dawn.

Khel turte

Season laklawh laiin hliam ngah mah se tun dinhmunah chuan Inter an dam kim thawkhat a, Hakan Calhanoglu chiah hliam vanga inlan lo tur a awm. Turkish midfielder awm lo mah se Nicolo Barella, Piotr Zielinski leh Henrikh Mkhitaryan te an awm avangin an buai phah lo ang.

Inter tan tun season-ah rawlthar Pio Esposito a khel ṭha a, Lautaro Martinez-a inhliam laiin a chance neih a hmang ṭangkai. Mahse Argentine forward Martinez a dam leh tawh a, inelna hrang hranga goal 22 khung tawhtu hi Marcus Thuram nen an inkawp leh dawn, bench-ah Esposito a ṭhut a rinawm zawk.

Tlarhnung lamah club liante awh rawn Alessandro Bastoni leh Manuel Akanji te an awm thei dawn a, tawnhriat ngah Francesco Acerbi-a'n a ho thei dawn bawk. Full back-ah Serie A season khata assist nei hnem ber Federico DiMarco leh Denzel Dumfries te an awm leh dawn a, anni hi tlarhnung leh tlarhma tan an ṭangkai ṭhin avangin zaninah pawh an pawimawh leh ang.

Lazio tan Gustav Isaksen leh Matteo Cancellieri te chu an innghahna a ni leh dawn a, anni bakah hian Barcelona leh Chelsea tan pawha khel tawh Pedro an nei a, Spanish forward hi kum 38 ni ve tawh mah se a team tan a la ṭangkai hle.

Pedro bakah hian Arsenal midfielder hlui Matteo Guendouzi leh Paolo Maldini fapa, Daniel Maldini te an la awm a, Inter laka danglamna siam turin theihna sang tak an nei.

An inthlau

Tun season Serie A-ah team pahnihte hi vawi hnih an inhmachhawn tawh a, Inter an chak ve ve a, an champion tawh bawk. Inter hian treble champion ni thei turin beiseina sang tak nei mah se, Champions League last 16-ah Bodo/Glimt an hneh lo a, an beiseina a thamral.

Treble champion ni thei ta lo mah se, nomawi chawi theih ang apiang chu hloh an duh tawh dawn lo a, Inrinni zan khan Lazio hi 3-0 a an hneh tawh bawk avangin rinkai zawk an ni.

Hetihlai hian Lazio erawh beisei an pha lo a, pakuanaah awm mekin, match hnih khelh tur la awmah pasarihna aia sangah an awm thei tawh lo.

League aṭangin Europe-ah an inlan thei dawn lo a, mahse Coppa Italia an champion chuan Europa League an khelh theih dawn avangin thi leh thau pawlhin an khel tawh dawn a, Inter tan zuam sual theih an ni.